2024-11-29

Kansono pri Petrelo

La Petrelo

(La Kansono Pri La Petrelo)

Maxim Gorky


Super griz maral planajo vento nubi amasigas. Inter nubi ta e l'maro fiere flugas la Petrelo, quale ul fulmino nigra.
Yen per alo tushas ondon, yen acensas adsub nubi, krias lu, e nubi audas joyo en ta krio brava.
En ta krio - sturmo-dursto! Povo-forcon, pasion-flamon, persuadeson pri la vinko audas nubi en ta krio.
Muevi jemas ante sturmo, - jemas e pelmele flugas super maro e prontesas parcelar teroro sua pri tempesto ye mar-fundo.
Ed kolimpi anke jenas, - ne juebla da kolimpi es batalio di la vivo: oli timas tondro-stroki.
Gros pinguino inter roki celas sua timideso... Nur Petrelo fiere-sola glitas brave ed libere super maro griz pro spumo!
Sempre plu ad-infre nubi tenebroz decens ad maro, kantas ed ad-supre springas ondi renkontrante tondro.
Tondro grondas. Iracego-spuma ondi defias vento. Yen ke vento vigoroze embracegas ond-amaso
E kun omn fortesi sua jetas li ad abruptaji, frakasante ye spric-guti la smeralda grandegaji.
La Petrelo flug kriante, quale tenebroz fulmino flech-simil trasekas nubi, ed per ali tondas spumo.
Demonatre lu flugadas, - nigr ed fier tempest-demono, - yen lu ridas, yen singlutas, ridas lu pri morna nubi, ed singlutas lu pro joyo!
En la tondra iracego l'atencem demono sentas fatigeso ja de longe, lu certesas ke ne celos nubi suno, no, ne celos!
Vent[o] ululas... Tondro grondas... Per blu flamo flagras nubi super la sen-funda maro, l'maro fulmin-flechin kaptas
Ed extingas en abiso. Quale fairoz serpenti en la maro desaparas reflekturi d[i] ic fulmini.
- Balde venos la tempesto!
La Petrelo brava fiere flugas inter la fulmini super iracoza maro; krias l'vinko-auguranto:
- Venez la tempesto forta!


2023-03-24

GRUZIANA KANSONO

GRUZIANA KANSONO

Bulat Okudjava

1967

 

Aden sulo varmeta me pozos semino vitala,
Kisos me vita brancho e kolios la grapi matur.
Me invitos amiki, regulos la kordio por amo,
Altre por quo vivar sur la Tero eterna ni dur.

Venez gasti a me por gustar saporoz regalaji,
Dicez, bone o male kustumas vi men reputar?
Cielal rejo absolvos me de omna mea kulpaji,
Altre por quo la Teron etern duras ni habitar.

En obskura red vesti a me kantos kar mea Dali,
Vestizit per blank-nigra me, kap-inklinint avan el,
Obliviint omno altra, chagrenos e mortos finale,
Altre por quo habit ni la Tero eterna e bel.

Pos ke l'suno decensos lasante noktala mareo,
Me itere, itere ri-videz ya preter-pasant
Blank bufalo, blu aglo, kun li anke truto orea,
Altre por quo la Teron etern esas ni habitant.

 

2023-03-08

Seglo

Seglo

da Mihail Lermontov

1832 y.

 

Blankesas seglo tote sola
En nebuloza maro blu!..
Quon serchas lu en lando fora?
Quon heme abandonis lu?..

Dal vento l'ondi agitesas,
E flexas masto kraketant...
Ve! Lu ne serchas feliceso
Ed ne de ol lu es fugant!

Sub lu fluad azuro hela,
Sunala radii lu karez...
Ma vol tempeston lu rebela,
Quale se ibe lu kalmes!
 

2023-03-03

Ek Osip Mandelstam

E per kuliero iracoza
Tu probas spumigar vitelo.
Ol blankeskint, ol langoroza
Demandas, tamen, plusa zelo.

2021-08-13

Tigro

Tigro

William Blake

Tigro, tigro, flam-tempesto,
Brul tu en noktal foresti.
Di qua la manuo nemortiva
Taliis bela timigivo?

Ka en abismi od cieli
Es acendit okuli-steli?
Per qua ali lu flugeskis?
Flamon manuo qua teneskis?

Di tua kordio l'nervin qua
Arto partordar povab?
Manuo qua sen remorsar
Igis kordio pulsar?

Qua martelo? Qua kateni?
En furnazo qua lu tenis
Kranion tua, parklemante
Terorigi mortiganta?

Pos ke forjetis lancin steli
E lakrim-arozis cielo
Ka joyis lu pro la rezulto?
Ka lu l'Agnelon anke skultis?

Tigro, tigro, flam-tempesto
Brul tu en noktal foresti.
Di qua la manuo nemortiva
Taliis bela timigivo?
 

2021-07-26

Oh, quanta astoniv deskovrin...

da Alexandr Pushkin

Oh, quanta astoniv deskovrin
Prepar' spirito edukera
Ed experienco, la filio di la grav erori,
Ed geniozeso, l'amiko di la paradoxi,
E plus hazardo, l'deo inventera

LA GRUI

LA GRUI

muziko da Yan Frenkel
versi da Rasul Gamzatov

Me kelka-tempe kredas ke soldati
Qui pos sangoz batalii a ni mank
Ne aden tero esis transpozata
Ma transformesis a la grui blank

De ta eventi dum la tempi posa
A ni li sendas voci lor flugar.
Ka ne pro to nerare afliktoze
Ni silencesk' lor cielon regardar.

Flug, flug en cielo fatigit gru-trupo,
Ol flugas en la krepuskulo kold.
Es mikra inter-spaco en ta grupo,
E forsan a me apartenas ol.

Venabos dio ed en grua pelo
Me flugos en krepuskulal aero
Vokante kom ucelo de sub cielo
Vi omna qui restabas sur la Tero

NOTI:

La kansono esas dedikita a la soldati qui perisis dum la Duesma Mond-milito

Kansono pri Petrelo

La Petrelo (La Kansono Pri La Petrelo) Maxim Gorky Super griz maral planajo vento nubi amasigas. Inter nubi ta e l'maro fiere flugas la...